"Bavariya" himoyachisi Alfonso Devis shartnomasini uzaytirish uchun maoshini sezilarli darajada oshirishni talab qilmoqda. Bu haqda Bild nashri xabar bermoqda.
Amaldagi kelishuvga ko‘ra, futbolchi yiliga 9 million yevro oladi. Avvalroq, futbolchi klub bilan maoshini 12 millionga oshirish bo‘yicha dastlabki kelishuvga ega edi.
Myunxenda rahbariyat almashganidan keyin kanadalik futbolchining pozisiyasi ham o‘zgardi. Endi u yiliga 15 million yevro talab qilmoqda. Bu myunxenliklarning eng ko‘p maosh oluvchi futbolchilari darajasiga to‘g‘ri keladi.
Agar "Bavariya" Devisning shartlarini bajarmasa, u yangi shartnoma imzolamaydi. Tomonlar o‘rtasidagi amaldagi kelishuv 2025 yilning iyunigacha amal qiladi.
Madridning “Real” klubi 23 yoshli himoyachiga qiziqish bildirmoqda. Myunxenliklar futbolchini qanday sharoitda qo‘yib yuborishi mumkinligi avvalroq ma’lum qilingandi.
