"Chelsi" himoyachisi Trevo Chaloba qishki transfer oynasida London klubini tark etishi mumkin. Bu haqda Football Insider nashri xabar bermoqda.

Manbaga ko‘ra, "aristokratlar" endi 24 yoshli futbolchining xizmatlariga muhtoj emaslar. Klub futbolchining vakillariga o‘z mijozi uchun boshqar variantlarni qidirishni boshlash zarurligi haqida xabar berdi. Qayd etilishicha, "Tottenxem" va "Roma" angliyalik himoyachini o‘z safiga qo‘shib olmoqchi.

Chaloba bu mavsumda jarohati sabab "Chelsi" safida birorta ham o‘yin o‘tkazmadi. O‘tgan yili himoyachi barcha turnirlarda 33 ta o‘yinda maydonga tushgandi. Futbolchining London klubi bilan shartnomasi 2028 yilning iyun oyi oxirigacha amal qiladi. Transfermarkt portali futbolchining narxini 18 million yevroga baholamoqda.

Avvalroq, "Chelsi" yana 3 nafar futbolchidan qutulishni niyat qilgani haqida xabar berilgandi.