“Navbahor”ning yakunlangan mavsumga oid statistik ma’lumotlari bilan tanishtirishda davom etamiz.

Quyida e’tiboringizga “lochinlar”ning Superliga-2023da qayd etgan mag‘lubiyatsiz va “quruq” seriyalari bilan tanishtiramiz.

Yakunlangan mavsumda “Navbahor” darvozasiga 13 ta o‘yinda raqiblar to‘p kirita olishmadi.

Albatta, ushbu muvaffaqiyatda jamoa darvozaboni O‘tkir Yusupov bilan birgalikda tajribali va mahoratli himoyachilarning ham munosib hissalari bor.

Ta’kidlash joizki, Superliga–2023da “Navbahor” o‘z darvozasidan eng kam to‘p o‘tkazgan, ya’ni, himoyasi eng mustahkam 3 ta jamoadan biri (19 ta) bo‘ldi.  

Mavsum-2023da “lochinlar” to‘rt marta mag‘lubiyatsiz seriyani qayd etishdi. Eng uzoq shunday seriya 10 (!) o‘yindan (6-15-turlar) iborat bo‘ldi hamda ushbu seriyani 16-turda Namanganda “Paxtakor” to‘xtatdi (1:2).

Shuningdek, “Navbahor” hisobida ikki marta 3 uchrashuv (20-21 va 23-turlar, 24-26-turlar) va  bir marta 2 bellashuv (1-2-turlar)dan iborat mag‘lubiyatsiz seriya ham mavjud.

Bunga izoh sifatida shuni keltirish lozimki, Namanganda “Nasaf”ga qarshi kechgan 22-tur bahsi ma’lum sabablarga ko‘ra, 23-tur o‘yinidan keyin o‘tkazilgandi. Statistik ma’lumotda shu ham inobatga olindi.      

Ta’kidlash joizki, yakunlangan mavsumda “lochinlar” 3 marta  “quruq” seriyani qayd etishga ham muvaffaq bo‘lishdi.

Samvel Babayan shogirdlarining eng ko‘p “quruq” seriyalari 5 ta uchrashuv (6-10-turlar)dan iborat bo‘ldi. Keyin esa ikki marta 2 ta o‘yin (1-2-turlar, 20-21-turlar)dan iborat “quruq” seriya qayd etildi.

Shuningdek, ta’kidlaganimizdek, yuqoridagi bahslardan tashqari, yana 4 ta bellashuvda (4, 13,  18, 20-turlar) “lochinlar” o‘z darvozalari daxlsizligini saqlab qolishdi.

“Navbahor” PFK matbuot xizmati.