Eyndxovenning PSV klubi joriy mavsum start qismida aqlga sig‘mas darajada ajoyib.
Eyndxovenning PSV klubi joriy mavsum start qismida aqlga sig‘mas darajada ajoyib. Diqqat qiling, Peter Bosh boshqaruvidagi jamoa Niderlandiya Eredivizionida g‘olibona yurishini hamon davom ettirmoqda - dastlabki 15ta turda 15ta g‘alaba! «Qizil-oqlar» shu jazava mobaynida 52ta gol urib, atigi 6ta qo‘yib yuborishdi. Umuman, ular bu borada Niderlandiya chempionati rekordiga tobora yaqinlashmoqdalar!
Tarixiy g‘alabalar. PSV hozir chindan ham, qoyilmaqom g‘alabali seriyaga ega - Eredivizionda ketma-ket 15ta o‘yinni o‘z foydasiga hal qildi. Bu liga tarixida kuzatilayotgan ikkinchi uzun seriyadir. E’tiborli tomoni, chempionat rekordi ham aynan PSVning o‘ziga tegishli. Eyndxoven jamoasi mavsum-1987|1988da qatorasiga 17ta o‘yinda g‘alaba nashidasini surgan.
Bo‘lajak chempionmi? Tabiiyki, PSV Eredivizion turnir jadvalida katta ishonch bilan peshqadamlik qilmoqda. Ayni payt «qizil-oqlar» hisobida 45 ochko bor. Eng yaqin ta’qibchi «Feyenoord» esa 35 ochkoga ega. Demak, hozirning o‘zida o‘rtadagi farq 10 ochkoni tashkil etmoqda. Ha, PSV shu ketishda chempionlik masalasini muddatidan ancha oldin yopishi mumkin. Umuman, Bosh jamoasini liga rekordidan atigi 2ta g‘alaba ajratib turibdi.
Samaradorlik - kosmos! PSV ajoyib sport formasida ekanligini gollar nisbatiga qarab ham osongina fahmlash mumkin. Peter Bosh jamoasi bunga qadar Niderlandiya chempionati tarixida qatorasiga 11ta o‘yinda kamida 3ta gol urgan birinchi ishtirokchi bo‘lgandi. Ushbu seriya 3:1, 4:0, 4:0, 4:0, 3:0, 3:1, 4:0, 3:1, 5:2, 6:0 va 4:0 hisoblarini o‘z ichiga oldi. PSV shundan keyin «Tvente» darvozasiga ham 3ta gol urdi. Faqat 14-turga kelib, asosiy raqib - «Feyenoord» maydonidagi bahsda «kamida 3ta gol» seriyasi uzildi, asosiysi, klubning g‘alabali odimi davom etdi, baribir (2:1).
