Jurnalist Qahramon Aslanov «Manchester Yunayted» klubi tomonidan so‘nggi bir yarim yil ichida transfer qilingan futbolchilarning joriy mavsumdagi holati va o‘yiniga izoh berdi.

1.Martines - hozircha eng yaxshi transfer. O‘tgan 14 oydan 7 oyini o‘tkazib yubordi. Ikki marta jarohat (ikki oy, to‘rt oy) tufayli, bir marta jahon chempionatidan keyin formaga qaytish.

2.Malasiya - Yaxshi boshladi, ammo Shou formaga kirganida o‘rtadagi farq sezildi. O‘tgan mavsumda atigi 14 o‘yinni asosiyda boshladi. Bu yil hali jarohatdan tiklanmadi.

3.Antoni - katta summaga olib kelindi, ayni damda apreldan buyon gol urolmadi. Assist ham yo‘q.

4.Kazemiro - top futbolchi. Ammo yoshi 30 dan oshgan. O‘tgan mavsumning 16 o‘yinini jarohatlar, diskvalifikasiyalar tufayli o‘tkazib yubordi. Bu mavsumda uch oy lazaretda.

5.Eriksen - shunchaki, rotasiya uchun olingani ma’lum, o‘tgan yili 2 oy, bu mavsum ham 2 oy jarohatda o‘tkazdi.

6.Vergost - ijaraga olindi, APLda birortayam gol urolmadi. Ishonchni oqlamagani uchun olib qolinmadi.

7.Zabitser - Ijaraga keldi, ishonchni oqlay olmadi.

8.Onana - katta summaga olib kelindi. Hozircha ishonchni oqlay olmadi.

9.Maunt - shartnomasi bir yil qolgan, so‘nggi ikki yilda deyarli o‘ynolmagan futbolchi uchun katta summa to‘landi. APLda atigi 4 o‘yinda asosiyda tushdi. Qolgan payt jarohatda.

10.Amrabat - Fred darajasida ham o‘ynolmadi. Ijaraga olingan, qaytib ketsa kerak.

11.Xoylund - katta summa to‘landi. Hozircha APLda 1 gol.

12.Regilon - qanot himoyachilari safdan chiqqach ijaraga olindi. Sog‘ bo‘lsa-da, o‘rniga o‘ng qanot o‘yinchisi Dalot chapda o‘ynayotganidan kelajagi ma’lum. U ham ikki oy jarohatda o‘tkazdi.

13.Evans - chempionshipga tushib ketgan «Lester» yangi shartnoma bermagan futbolchi.

14.Bayindir - Onana shuncha xato qilsayam, birgina o‘yinga ishonilmaydigan darajadagi ikkinchi posbon.

Qariyb ikki yil, uch transfer oynasi, o‘nlab transfer, ammo hozirdan turib qaralsa, bulardan faqat Martines, qisman, agar o‘ynab ketishsa, Onana va Xoylund, kelajakda ham asosiy tarkibdan o‘rin olishi mumkin. Maunt noma’lum. Ayni damda bu futbolchilarning birortasi APLdagi biror top-klubning asosiy tarkibiga tortmaydi. Nafaqat «Arsenal» yo «Siti», hatto «Aston Villa» yoki «Nyukasl» ham bu nomlarning ko‘pini olmagan bo‘lardi. Hozir Angliyaning istalgan klubida shunday futbolchi borki, Manchesterga kelsa, o‘z pozisiyasida bemalol asosiyga aylanadi. Qani daraja? Axir «MYU» kabi klubga keladigan futbolchilar qandaydir minimum talablarga mos kelishi kerak emasmi?

Dahshat. Klubda skauting bo‘limi, sport ishlari bo‘yicha rahbarlar o‘z ishini qilmasa, hamma qarorlar pala-partish, murabbiyga tashlab qo‘yilsa, odatda, mana shunday oqibatga kelinadi.