Yakuniga yetayotgan 2023 yil sarhisobini qilib, "Dinamo" jamoasining tom ma’nodagi 12-o‘yinchisiga aylana olgan muxlislar va ularning yetakchisi Shavkat Burhonovni eslamasak adolatdan bo‘lmasdi.

«Dinamo»ning 2023 yilgi muvaffaqiyatlari zamirida Shavkat Burhonov yetakchiligidagi fan-klubning ham hissasi katta bo‘ldi. Samarqand klubi Pro ligada tomoshabinlar tashrifi bo‘yicha 1-o‘rinni egallab, «Dinamo»ni xoh uyda, xoh safarda ajoyib darajada qo‘llab-quvvatlashdi. Ya’ni, muxlislarimizning bu ligada raqobatchisi yo‘q edi. Ishqibozlarni bayram kuni ta’riflash uchun aslida so‘z ko‘p, ammo ularning «Dinamo» uchun qay daraja muhimligini birgina fakt – jamoaning O‘zbekiston kubogidagi natijalari ko‘rsatib berdi. «Dinamo» aynan jonkuyar muxlislari qarshisida «Lokomotiv» darvozasiga 3ta gol urdi, amaldagi chempion «Paxtakor» darvozasini uch marta ishg‘ol etib turnirdan chiqarib yubordi, «Olimpik» darvozasiga 4ta gol yo‘lladi va yarimfinalgacha yetib keldi. Qarshidagi o‘yinda esa stadiondagi mehmon jamoa tribunalari bu daraja to‘lmagandi. «Dinamo» aynan 3 mingga yaqin muxlislarning qo‘llashi evaziga yakunda «Nasaf» bilan tengma-teng o‘ynadi va alamli tarzda kubokning bo‘lajak sohibiga yutqazdi. Mavsumdagi ilk mag‘lubiyatdan keyingi bu alamli ko‘z yoshlar aylanayotgan lenta singari kechagidek esimizda...

2023 yilning so‘nggi soatlarida, 2023 yil tarixga aylanishiga sanoqli daqiqalar qolganida «Dinamo» muxlislarini tilga olayotganimiz bejizga emas. Chunki, aynan ular fidoyilik va jonkuyarlik borasida o‘rnak bo‘la olishdi, qanchadan-qancha qiyinchiliklarga qaramay, Shavkat Burhonov faolligida Nukusdan Andijongacha borib, har qanday holatda jamoa bilan yelkama-elka turishdi. Aslida ham jonkuyarlik, sodiqlik tushunchalar aynan ularga xos.

Shaxsan «Dinamo»dagi 16 yillik faoliyatimdan ko‘rganim – jamoa bir necha marta quyi ligaga tushib ketganida ham, bir necha yillar avval moliyaviy og‘ir holatda qolib, yordamga muhtoj bo‘lganida ham «Dinamo»ni yolg‘iz qo‘ymay, suyukli jamoasi «Dinamo» ekanini baralla aytgan ham – samarqandlik muxlislar edi. 2024 yil ostonasida bu muxlislar Superligada «yondirish»larini ishonch bilan aytib, yangi yildagi «Dinamo» nihoyat ular orzu qilgan jamoaga aylanishiga tilak bildirib qolamiz.