Turkiyaning “Galatasaroy” klubi Ispaniyaning “Barselona” klubi bilan 20 yoshli himoyachi Aleks Balde transferi bo‘yicha muzokaralarga kirishdi, deya xabar bermoqda A Spor nashri. Istanbulliklar futbolchini olti oyga ijaraga olmoqchi.

Manbaga ko‘ra, ispan jamoasi Baldeni yanada rivojlantirish uchun ijaraga bermoqchi. Futbolchining o‘zi ham "Barselona"dagi tartibsiz vaziyat tufayli klubini vaqtincha o‘zgartirishga qarshi emas. Qayd etilishicha, transferdagi yagona to‘siq - "ko‘k-anorranglilar"ning himoyachini saviyasi yuqoriroq chempionatga ijaraga berish istagi.

Eslatib o‘tamiz, Aleks Kataloniya klubi tarbiyalanuvchisi hisoblanadi. U 2022 yilning yozida "Barselona" asosiy jamoasiga o‘tdi. Joriy mavsumda Balde klubning barcha turnirlarda 23 ta uchrashuvida qatnashib, bitta golli uzatmani amalga oshirdi.

Futbolchining ispan klubi bilan amaldagi shartnomasi 2028 yilning yoziga qadar tuzilgan. Transfermarkt portali Baldening bozor qiymatini 50 million yevroga baholagan.