Futbolchilarning transfer summasi bilan shug‘ullanuvchi transfermarkt portali Markaziy Osiyo mamlakatlari milliy jamoalari tarkibidagi eng qimmatbaho o‘yinchilar reytingini yangiladi.

Shuningdek, 5ta terma jamoa tarkibining yangilangan umumiy bahosi ham e’lon qilindi. Unga ko‘ra, anchadan buyon Markaziy Osiyoning eng qimmatbaho futbolchisi maqomini o‘zida saqlab kelgan Eldor Shomurodov yetakchilikni qo‘ldan chiqardi. Binobarin, «Kalyari»da ishlari uncha yurishmagan hujumchimizning transfer summasi pasayishda davom etmoqda. Transfermarkt portali ekspertlari xulosalariga ko‘ra, Italiyadagi legionerimizning bahosi yana 1 million yevroga arzonlashdi. Xullas, dekabr holati bo‘yicha Shomurodov huquqi 5 million yevroga baholanmoqda.

Endilikda Markaziy Osiyoning eng qimmatbaho futbolchisi - qozog‘istonlik Baxtiyor Zaynutdinov. Rossiyaning SSKA klubidan Turkiya Superligasi ishtirokchisi «Beshiktosh»ga yo‘l olgan etnik o‘zbekning bahosi ham biroz pasaydi oxirgi hisob-kitoblarda. Lekin Baxtiyorning yorlig‘i 6 million yevrodan tushgani yo‘q. Aniqrog‘i, u transfer summasi bo‘yicha 500 ming yevro yo‘qotdi, xolos. Markaziy Osiyodagi eng qimmatbaho darvozabon - tojikistonlik Rustam Yatimov. Uning transfer bahosi 900 ming yevroga ko‘tarildi. Eslatma, Rustam OCHLda kimsan Krishtianu Ronaldu asabini buzganidan keyin ancha tanildi. «Istiqlol» kiperi ortida o‘zbekistonlik darvozabonlar bor - 700 ming yevroga baholanayotgan Abduvohid Ne’matov («Nasaf») va O‘tkir Yusupov («Navbahor»).

Garchi futbolchilarimiz va darvozabonlarimiz mintaqada yuqori mavqeini boy bergan bo‘lsalar-da, O‘zbekiston milliy jamoasi tarkibning umumiy bahosi bo‘yicha Markaziy Osiyoda hamon 1-o‘rin egasi bo‘lib qolmoqda. 32,55 million yevro - bu jamoamizning umumiy bahosi. 2-o‘rindagi Qozog‘iston milliy jamoasining umumiy summasi 21,5 «limon»dan balandroq. 

Markaziy Osiyo mamlakatlari milliy jamoalari umumiy summasi va ularning eng Qimmatbatbaho 3 nafar futbolchisi bahosi

O‘zbekiston milliy jamoasi

Jami summa: 32,55 million yevro

FIFA reytingi: 68-o‘rin

1. Eldor Shomurodov (hujumchi, 28 yosh) - 5 million yevro

2. Abbos Fayzullayev (yarim himoyachi, 20 yosh) - 4 million yevro

3. Aziz G‘aniyev (yarim himoyachi, 25 yosh) - 3 million yevro

Qozog‘iston milliy terma jamoasi

Jami summa: 21,63 million yevro

FIFA reytingi: 100-o‘rin

1. Baxtiyor Zaynutdinov (yarim himoyachi, 25 yosh) - 6 million yevro

2. Nurali Alip (himoyachi, 24 yosh) - 3 million yevro

3. Aleksandr Zuyev (yarim himoyachi, 27 yosh) - 900 ming yevro

Tojikiston milliy jamoasi

Jami summa: 7 million yevro

FIFA reytingi: 106-o‘rin

1. Rustam Yatimov (darvozabon, 25 yosh) - 900 ming yevro

2. Alisher Jalilov (yarim himoyachi, 30 yosh) - 700 ming yevro

3. Zoir Jo‘raboyev (himoyachi, 25 yosh) - 600 ming yevro

Qirg‘iziston milliy jamoasi

Jami summa: 5,90 million yevro

FIFA reytingi: 98-o‘rin

1. Guljigit Aliqulov (yarim himoyachi, 23 yosh) - 550 ming yevro

2. Alimardon Shukurov (yarim himoyachi, 24 yosh) - 450 ming yevro

3. Tamirlan Kuzibayev (yarim himoyachi, 24 yosh) - 400 ming yevro

Turkmaniston milliy jamoasi

Jami summa: 3,30 million yevro 

FIFA reytingi: 141-o‘rin

1. Ruslan Mingazov (yarim himoyachi, 32 yosh) - 550 ming yevro

2. Teymur Garuyev (yarim himoyachi, 23 yosh) - 250 ming yevro

3. Arslanmurat Amanov, yarim himoyachi, 33 yosh) - 200 ming yevro