“Tottenxem” hujumchisi Son Xyon Min FIFA tomonidan yilning eng yaxshi murabbiyi sovrini uchun ovoz berishda ishtirok etdi.

Avvalroq koreyalik “Yilning eng yaxshi futbolchisi” nominasiyasida qaysi nomzodga ovoz bergani ma’lum bo‘lgandi.

Son eng yaxshi murabbiy sifatida o‘tgan yozdan beri "shporlar"ni boshqarib kelayotgan "Tottenxem"ning hozirgi ustozi Anje Postekogluni tanladi.

Uning qo‘l ostida jamoa Premyer-liga turnir jadvalida beshinchi o‘rinda bormoqda. “Tottenxem”ning sobiq hujumchisi Xarri Keyn avstraliyalik bosh murabbiyligida birorta ham rasmiy o‘yin o‘tkaza olmagan bo‘lsa-da, Postekogluni o‘z ro‘yxatiga uchinchi o‘ringa qo‘ydi.

Eslatib o‘tamiz, kecha tunda FIFA talqiniga ko‘ra yilning eng yaxshi murabbiyi deb “Manchester Siti” vakili Pep Gvardiola e’tirof etilgan edi.