Hindiston terma jamoasi bosh murabbiyi Igor Shtimas Osiyo kubogi 2-turi doirasida bo‘lib o‘tgan O‘zbekiston qarshi o‘yin (0:3) borasida o‘z fikrini bildirib o‘tdi.
"Qiziqarli o‘yin bo‘ldi. O‘zbekistonni tabriklayman. Ular yana bir nechta gol urishi mumkin edi. O‘z navbatida biz ham to‘plar kiritishimiz mumkin edi. Biz ahmoqona xatolar tufayli gollar o‘tkazib yubordik. Ayni paytda bizning borimiz shu. Bizga bir necha nafar yetakchi futbolchilar yetishmadi. O‘yin oldidan biz Lalliansuale Chxangteni ham yo‘qotdik. Listonda ham harorat ko‘tarildi.
Bugungi o‘yindan saboq chiqarib, o‘z ustimizda ishlashimiz zarur. Biz o‘sayotgan jamoamiz. Bunday bahslardan chiqarilgan xulosa kelajakda bizga asqotadi. Oldimizda yana bitta o‘yin qoldi. Keyingi bosqichga chiqish imkoniyatga egamiz. Mag‘lubiyatlarimizga sabab bo‘layotgan kichik xatolarni to‘g‘rilashimiz kerak", — dedi Shtimas.
