Angliya terma jamoasining sobiq futbolchisi Alan Shirerning fikricha, "Arsenal"ga yangi hujumchi kerak.
Mikel Arteta shogirdlari shanba kuni bo‘lib o‘tgan Premyer-liga bahsida "Kristal Pelas"ni 5:0 hisobida mag‘lub etish bilan omadsizlikka chek qo‘ydi, ammo Shirer "kanonirlar" hujumlarini kuchaytirishi kerakligiga ishonchi komil.
"Bugun "Arsenal" oson g‘alaba qozondi, ammo men hali ham jamoani keyingi bosqichga olib chiqish va Premyer-liga chempionligi uchun jiddiy kurash olib borish uchun sifatli markaziy hujumchi kerak deb o‘ylayman.
Men "Arsenal"ning "Vest Xem" va "Liverpul"ga qarshi oldingi o‘yinlarida bo‘lganman va ko‘rganmanki, ko‘p imkoniyatlar ko‘kka sovurilmaganda ikkala o‘yin ham g‘alaba bilan yakunlanishi mumkin edi.
Menimcha, "Brentford" futbolchisi Ivan Touni yaxshi variant, ammo bu oy hech qanday transferlar bo‘lmaydi", deb yozdi Shirer BBC ruknida.
