Toshkentdagi “King Plaza” mehmonxonasida o‘tkazilgan CAFA hakamlar seminarining birinchi qismi yakunlandi. 21-23 yanvar kunlari hakamlar uchun o‘tkazilgan nazariy-amaliy seminarlar davomida a’zo mamlakatlardan jami 25 nafar hakamlar (17 nafar erkak va 8 nafar ayol hakamlar) ishtirok etishdi.
Darslar davomida ishtirokchilar FIFA standartlari asosida nazariy va amaliy mashg‘ulotlarda ishtirok etib, tajribali mutaxassislardan zaruriy bilim va ko‘nikmalarni egallashdi. E’tiborli tomoni, ushbu seminarda mamlakatimizdan 7 nafar FIFA hakamlari — Firdavs Norsafarov, Asker Nadjafaliyev, Akobir Shukurullayev, Rustam Lutfullin, Roziyabonu Yusupova, Gulshoda Saitqulova va Nasibabonu Toshmuhammedova ishtirok etdi.
Bugun seminarning yopilish marosimida O‘FA birinchi vise-prezidenti, CAFA hakamlar qo‘mitasi raisi Ravshan Irmatov va CAFA Bosh kotibi Ulug‘bek Karimov ishtirokchilariga tegishli sertifikatlar topshirib, ularga kelajakdagi faoliyatlarida omad tilashdi. Ma’lumot o‘rnida, ertaga a’zo mamlakatlar hakamlari ishtirokida VAR kurslariga start beriladi.
