"Chelsi" yarim himoyachisi Koul Palmer Angliya liga kubogi yarim finalining javob uchrashuvida "Midlsbro"ga qarshi o‘yinda dubl qayd etdi. Shu tariqa, bu gollar 21 yoshli yarim himoyachining London jamoasi uchun joriy mavsumdagi 10 va 11-gollariga aylandi. Yosh futbolchi ayni damda "Chelsi"ning barcha musobaqalar to‘purari bo‘lib turibdi.
Palmer "Manchester Siti" tarbiyalanuvchisi hisoblanadi. U yozgi transfer oynasining so‘nggi kunida 47 million yevro evaziga "Chelsi"ga o‘tdi. Bu mavsumda yarim himoyachi londonliklar safida barcha turnirlarda 23ta o‘yin o‘tkazib, 11ta gol va 7ta golli uzatmani amalga oshirdi. Futbolchining London klubi bilan shartnomasi 2030 yilning iyun oyi oxirigacha amal qiladi.
