"Manchester Yunayted" yarim himoyachisi va sardori Brunu Fernandesh jamoaning Angliya kubogining 1/8 final bosqichiga chiqqani haqida gapirdi.

Kecha, 28 yanvar kuni “qizil iblislar” “Nyuport Kaunti”ni mag‘lub etishdi. “Rodney Parade” stadionida kechgan uchrashuv 4:2 hisobida yakunlandi.

“Albatta, bu mavsumda sovrin yutish imkoniyati Angliya kubogida ekanligini tushunishimiz kerak. Finalga chiqish uchun hamma narsani berishimiz kerak. Lekin biz bilamizki, mavsum avvalgidek yomon ko‘rinmasligi uchun bu sovrinni qo‘lga kiritishga harakat qilishimiz kerak, chunki bu biz uchun muhim.

O‘tgan yili biz finalda edik, afsuski, kubokni qo‘lga kirita olmadik. Biz Angliya kubogi muxlislarimiz, klubimiz, mamlakatimiz uchun qanchalik muhimligini bilamiz", - deya Fernandesh so‘zlarini keltiradi "Manchester Yunayted" rasmiy sayti.

O‘tgan 2022/2023 yilgi mavsumda "Manchester Yunayted" finalda "Manchester Siti"ga mag‘lub bo‘lgandi. Uchrashuv 1:2 hisobida yakunlangan.