"Манчестер Юнайтед" ярим ҳимоячиси ва сардори Бруну Фернандеш жамоанинг Англия кубогининг 1/8 финал босқичига чиққани ҳақида гапирди.

Кеча, 28 январь куни “қизил иблислар” “Нюпорт Каунти”ни мағлуб этишди. “Родней Параде” стадионида кечган учрашув 4:2 ҳисобида якунланди.

“Албатта, бу мавсумда соврин ютиш имконияти Англия кубогида эканлигини тушунишимиз керак. Финалга чиқиш учун ҳамма нарсани беришимиз керак. Лекин биз биламизки, мавсум аввалгидек ёмон кўринмаслиги учун бу совринни қўлга киритишга ҳаракат қилишимиз керак, чунки бу биз учун муҳим.

Ўтган йили биз финалда эдик, афсуски, кубокни қўлга кирита олмадик. Биз Англия кубоги мухлисларимиз, клубимиз, мамлакатимиз учун қанчалик муҳимлигини биламиз", - дея Фернандеш сўзларини келтиради "Манчестер Юнайтед" расмий сайти.

Ўтган 2022/2023 йилги мавсумда "Манчестер Юнайтед" финалда "Манчестер Сити"га мағлуб бўлганди. Учрашув 1:2 ҳисобида якунланган.