“Atletiko Madrid” seshanba kuni “Yuventus” hujumchisi Moyze Kinning transferi haqida e’lon qiladi, deb xabar beradi Mundo Deportivo.

Manbaga ko‘ra, 23 yoshli futbolchi allaqachon tibbiy ko‘rikdan o‘tgan, fotosessiyada ishtirok etgan va klub OAVlariga intervyu bergan. Kin 2023/2024 yilgi mavsum oxirigacha ijara asosida "matraschilar"ga o‘tadi. Bitim summasi 500 ming yevroni tashkil qiladi va klub futbolchining maoshini to‘liq to‘lash majburiyatini oladi.

Kin "Yuventus" tarbiyalanuvchisi va akademiyadan asosiy jamoaga qadar yo‘lni bosib o‘tgan. Futbolchining Turin klubi bilan shartnomasi 2025 yilning yoziga qadar mo‘ljallangan. Transfermarkt Kinni 18 million yevroga baholamoqda.