Odatda yanvar oyidagi transferler oynasi ancha qizg‘in kechardi. Ammo bu safar unday bo‘lmadi. Masalan, bundan bir yil oldingi transferlar oynasi futbol tarixidagi eng ko‘p pul sarflangani bo‘ldi. Bugun esa katta klublar qoidalardan chetlab chiqmaslikka harakat qilmoqda. Shunga qaramay, ayrim past narxli futbolchilar sotilishi yoki ijaraga berilishi mumkin. Quyida ularning nomlarini bilib olasiz.
Jon Duran
Duran "Chelsi" radariga tushgan so‘nggi nomlardan biri sanaladi. Yosh hujumchi uzoq kelajakda "aristokratlar" uchun foydali xaridga aylanishi mumkin. 20 yoshli futbolchi Pochettino tomonidan qadrlanadi. Uning narxi va maoshi boshqa variantlarnikiga qaraganda ancha arzondir. Xarholda, Karim Benzema Durandan karrasiga ko‘p maosh talab qilishi turgan gap.
Konor Gallaxer
"Chelsi" hujumchi sotib olishni o‘ylamoqda. Ammo Feyr Pley qoidalari asosida bu klub xariddan oldin sotish ishlarini amalga oshirishi ham talab qilinadi. Jamoadan ketishi kutilayotgan nomlarning eng kattasi bu Konor Gallaxerdir. 23 yoshli yarim himoyachiga "Tottenxem" qiziqish bildirgan. "Chelsi" esa Gallaxer uchun 50 million funt talab qilmoqda.
Migel Almiron
"Nyukasl Yunayted" moliyaviy Feyr Pleyga amal qilishi lozim. Buning uchun Almiron qurbon qilinishi mumkin. 29 yoshli hujumchiga "Al-SHabab" hamda "Al-Ahli" jiddiy qiziqish bilan qaramoqda. Agarda klub o‘tgan mavsum kabi 73.4 million funtlik zarar ko‘rishni istamasa, tezroq bunga qarshi choralar ko‘rib qo‘yishi kerak.
Kirnan Dyuzberi-Xoll
Yarim himoyachi "Lester Siti"dan ketishi aytilgan. Dyuzberi-Xoll APLga qaytishi mumkin. Unga "Brentford" hamda "Brayton" jiddiy da’vo qilmoqda. "Tulkilar" o‘zi uchun muhim sanalgan futbolchini 35 million funtdan kamiga sotmasligini bildirgan. Hozirda tomonlar muzokaralarni davom ettirmoqda.
Jeykob Remzi
"Aston Villa" futbolchisiga butun Yevropadan takliflar bor. Unga top-klublar jiddiy qiziqish bilan qaramoqda. 22 yoshli vinger uchun "Bavariya", "Nyukasl" va "Tottenxem" da’vogarlik qiladi. Remzi uchun belgilangan narx esa 50 million funtni tashkil etadi. Jamoa bosh murabbiyi Unai Emeri Remzini sotilmasligini bildirganiga qaramay, yaxshi taklif transferni ro‘yobga chiqarishi aniq.
ISMATOV J.
