Tajribali himoyachi Farrux Sayfiyev “Navbahor” bilan shartnoma imzoladi.  Bu haqda namanganliklar rasmiy telegram-kanali xabar berdi.

Sayfiyev 1991 yil, 17 yanvarda Samarqand shahrida tug‘ilgan. Futbolchilik faoliyati davomida “Nasaf” (Qarshi, 2012-2017 yillar),  “Paxtakor” (Toshkent, 2018-2023 yillar) jamoalarida o‘ynagan.

O‘tgan mavsumda poytaxtliklar tarkibida barcha musobaqalarda jami 31 ta o‘yinda maydonga tushib, 2 ta gol urgan holda, 8 ta golga assistentlik qilgan. Farrux Sayfiyev 2014 yildan buyon O‘zbekiston milliy terma jamoasi a’zosi.

"Biz Farrux Sayfiyevga “Navbahor”dagi faoliyatida omad yor bo‘lib, chiroyli o‘yinlari hamda gollari bilan “lochinlar”ning g‘alabalariga munosib hissasini qo‘shishiga tilakdoshmiz", - deyiladi klub rasmiy bayonotida.