"Liverpul"ning sobiq himoyachisi, hozirda Sky Sports eksperti bo‘lib ishlayotgan Jeymi Karrager "Manchester Yunayted"ning sobiq futbolchisi Gari Nevill Yurgen Klopp "mersisaydliklar" klubini tark etishini e’lon qilganidan keyin uni masxara qilganini aytdi.

"Men uyg‘onib, yangilikni ko‘rdim. Nevill menga chang‘i uchayotganini yozdi. Uning xabarini o‘qishimni xohlaysizmi? "Men Kursheveldaman, sizning murabbiyingiz ketadi va siz yana 30 yil azob chekasiz!" — Karragerning so‘zlaridan iqtibos keltirmoqda Daily Mail nashri.

Eslatib o‘tamiz, o‘tgan hafta Yurgen Klopp joriy mavsum yakunida "Liverpul"ni tark etishini ma’lum qilgandi. Nemis mutaxassisi o‘z bayonotida endi jamoaga murabbiylik qilishga kuch-quvvati yo‘qligini aniq aytib o‘tdi. 56 yoshli germaniyalik mutaxassis 2015 yilning 8 oktyabrida Angliyaning "Liverpul" klubini qabul qilib olgan edi. Bu vaqt ichida Yurgen Klopp “qizillar” bilan yettita sovrinni qo‘lga kiritdi.