Xabaringiz bor, hafta boshida Respublika futbol bo‘yicha sport mahoratini oshirish oliy maktabida Superliga hakamlari uchun qishki o‘quv-mashg‘ulot yig‘inlari boshlangan edi. Hafta davomida hakamlarimiz turli yo‘nalishlar bo‘yicha sinovdan o‘tkazildi va bilimlarini oshirib olishdi. VAR simulyatori bilan o‘tkazilgan mashg‘ulotlar esa barcha uchun esda qolarli tarzda o‘tgani, shubhasiz.
Yig‘inning so‘nggi kunida FIFA tomonidan FIFA hakamlari uchun jo‘natilgan yangi mavsum inventarlari o‘z egalariga tantanali tarzda topshirildi. Shu tariqa, qishki o‘quv-mashg‘ulot yig‘inlarining 1-guruhi uchun tadbirlar o‘z nihoyasiga yetdi. Yopilish marosimida O‘zFHM direktori Laziz Rixsiboyevich so‘zga chiqib, bu mavsum har galgisidanda qiyinroq bo‘lishini, muxlislar va keng jamoatchilikning futbolga e’tibori oshayotgani va bu har bir hakamdan ulkan mas’uliyat talab qilishini ta’kidlab, ularga yangi mavsumda omad tiladi.
Ma’lumot o‘rnida, ushbu 1-guruh yig‘inida Superliga o‘yinlarida ishlovchi 45 nafar bosh va yordamchi hakamlar ishtirok etishdi. Navbatdagi guruh (nazoratchilar uchun) yig‘ini ertaga, 3-fevral kuni start oladi.
Qishki o‘quv-yig‘inlari haqida qo‘shimcha ma’lumot berib boriladi.
