4 fevral kuni Germaniya Bundesligasining 20-tur uchrashuvi yakuniga yetdi va unda Myunxenning “Bavariya” va “Borussiya” Myonxengladbax klublari to‘qnash kelishdi. Jamoalar Myunxendagi (Germaniya) "Alyans Arena"da o‘ynashdi. Uchrashuvni Tobias Shtiler boshchiligidagi hakamlar brigadasi boshqarib bordi. "Bavariya" 3:1 hisobida g‘alaba qozondi.
Ushbu o‘yinda "qizillar" hujumchisi Tomas Myuller ishtirok etdi. Shu tariqa nemis futbolchisi “Bavariya” libosidagi 500-g‘alabasiga erishdi. U klub tarixida bu ko‘rsatkichga erishgan birinchi futbolchi bo‘ldi. Buning uchun Myullerga 690 ta o‘yin kerak edi.
Eslatib o‘tamiz, Myuller 2008 yildan beri "Bavariya"ning asosiy jamoasida o‘ynab kelmoqda. 34 yoshli Tomas “qizillar” safida 690 ta o‘yinda maydonga tushib, 237 ta gol urdi va 214 ta golli uzatmani amalga oshirdi.
