4 февраль куни Германия Бундеслигасининг 20-тур учрашуви якунига етди ва унда Мюнхеннинг “Бавария” ва “Боруссия” Мёнхенгладбах клублари тўқнаш келишди. Жамоалар Мюнхендаги (Германия) "Альянс Арена"да ўйнашди. Учрашувни Тобиас Штилер бошчилигидаги ҳакамлар бригадаси бошқариб борди. "Бавария" 3:1 ҳисобида ғалаба қозонди.

Ушбу ўйинда "қизиллар" ҳужумчиси Томас Мюллер иштирок этди. Шу тариқа немис футболчиси “Бавария” либосидаги 500-ғалабасига эришди. У клуб тарихида бу кўрсаткичга эришган биринчи футболчи бўлди. Бунинг учун Мюллерга 690 та ўйин керак эди.

Эслатиб ўтамиз, Мюллер 2008 йилдан бери "Бавария"нинг асосий жамоасида ўйнаб келмоқда. 34 ёшли Томас “қизиллар” сафида 690 та ўйинда майдонга тушиб, 237 та гол урди ва 214 та голли узатмани амалга оширди.