Kecha — 4 fevral kuni Superliganing yangi mavsumiga qur’a tashlandi. Bugun esa birinchi davra bellashuvlari sanalari aniq bo‘ldi.

"Navbahor" va "Nasaf" 1 mart kuni mavsumni boshlab beradi. Boisi ular 4-5 mart kunlari Chempionlar ligasining chorak finalida maydonga tushishi mumkin. Buning uchun har ikki klub fevral oyida bo‘lib o‘tadigan bosqichdan omon o‘tishi talab etiladi.

Liga o‘z-o‘zidan translyasiya va VAR texnikasi imkoniyatlarini inobatga oldi. Bir vaqtda bir shaharda ikki uchrashuv bo‘lmasligi ta’minlandi. Biroq VAR bilan bog‘liq holat 1-turda ayrim noqulayliklar keltirib chiqarishi mumkin. Sababi OFK Chempionlar ligasi bellashuvi uchun bizning texnikadan foydalanishi katta ehtimol.

Shuningdek, aprel oyida O‘zbekiston U23 terma jamoasi Parij Olimpiadasiga saralash bosqichi rolini ham o‘ynaydigan Osiyo kubogida ishtirok etadi. Bu esa 5-turdan o‘rin olgan "Metallurg" — "Olimpik" uchrashuvi qoldirilishiga sabab bo‘lishi mumkin. Qolgan jamoalar esa "Superliga va Pro liga reglamenti"ning tegishli punktlaridan kelib chiqib, taqvimga u yoki bu o‘zgarish kiritishni so‘rab murojaat qilishga haqli.

SUPERLIGA, 1-TUR
1 mart, juma
"NAVBAHOR" — "DINAMO"
"NASAF" — "OLIMPIK"
2 mart, shanba
"BUNYODKOR" — "QIZILQUM"
"SO‘G‘DIYONA" — "NEFTCHI"
3 mart, yakshanba
OKMK — "ANDIJON"
"LOKOMOTIV" — "METALLURG"
4 mart, dushanba
"SURXON" — "PAXTAKOR"