Osiyo chempionlar ligasi nimchorak final bosqichidan o‘rin olgan “Navbahor” – “Al-Ittihod”  o‘yinidan oldin o‘tkazilgan matbuot anjumanida bosh murabbiy Samvel Babayan ishtirok etdi.

— Osiyo chempionlar ligasidagi har bir o‘yin "Navbahor" uchun tarixiy ahamiyatga ega. Jamoa rahbariyati, murabbiylar va futbolchilar 2023 yilda katta hajmda ishni amalga oshirdi va OCHL pley-off bosqichiga chiqdik. Bir yil avval jahon futbol yulduzlarining Namanganga kelishini faqatgina orzu qilish mumkin edi. Bugun esa bu real voqeaga aylandi.

Ertaga biz nafaqat Namangan shahri yoki viloyati sharafini, balki butun mamlakat sharafini himoya qilamiz. Umid qilaman, yurtimizdagi barcha muxlislar "Navbahor"ga muxlislik qilishadi.

Raqib haqidagi gapiradigan bo‘lsam, "Al-Ittihod" alohida tanishtiruvga muhtoj emas. BU katta tarixga ega jamoa va ko‘p yutuqlarga erishgan. Klub safida jahon futbol yulduzlari to‘p tepadi. Tayyorgarlik borasida "Al-Ittihod" ustunlikka ega. Saudiya chempionatining ikkinchi davrasi boshlanganidan keyin bu jamoa ikkita rasmiy o‘yinda ishitrok etdi.

Biz esa mavsum erta boshlanishini inobatga olgan holda tayyorgarlik ishlarini olib bordik. Ko‘pgina nazorat o‘yinlarida ishtirok etdik. Ammo hech bir nazorat o‘yinida to‘liq tarkib bilan ishtirok eta olmadik.

Ertaga tartibli va yaxshi yo‘lga qo‘yilgan o‘yin, katta ishtiyoq va muxlislarimizning qo‘llab-quvvatlashi yordamida "Al-Ittihod"ga jiddiy qarshilik ko‘rsatishimiz mumkin.

— Karim Benzema ertaga "Navbahor"ga qarshi o‘yinda maydonga tushmaydi. Uning maydonga tushmasligi yaxshi holatmi yoki uning o‘yinda ishtirok etishini istarmidingiz?
— Aytib o‘tganimdek, jahon darajasida yulduzlarning O‘zbekistonga kelishi biz uchun katta tarix. Albatta, uning yurtimizga kelishini va bizga qarshi o‘yinda ishtirok etishini istardik. U maydonda bo‘lsa, yurtimizda futbolga qiziqish ortadi. Ammo Benzemasiz ham "Al-Ittihod" kuchli o‘yin namoyish etadi.