“Navbahor” – “Al-Ittihod” (0:0) jamoalari o‘rtasidagi o‘yindan keyingi matbuot anjumanining birinchi qismida mehmonlar bosh murabbiyi Marselo Galyardo va mazkur uchrashuvning eng yaxshi futbolchisi deb topilgan N`Golo Kantelar ishtirok etib, jurnalistlarning savollariga javob berishdi. Quyida ularning fikrlarini e’tiboringizga havola o‘tamiz.

Marselo Galyardo: - Biz yaxshi o‘yin o‘tkazdik, ammo maydon yuqori sifatda emasdi. Biz yaxshi himoyalandik va darvozamiz yonida xavf yaratilishiga yo‘l qo‘ymadik. Birdamlikda harakat qildik. Jamoaning o‘yinidan xursandman. 

Raqib himoyasi zich bo‘lganligi bois, uni yorib o‘tolmadik. Jidda shahridagi o‘yin boshqacha o‘tadi. So‘nggi vaqtlarda jarohatlar tufayli bizga omad kulib boqmadi. 

Biz 19 nafar futbolchi bilan o‘ynayapmiz, qolganlarning ham tezroq safga qaytishlari uchun harakat qilyapmiz. 

Bugun Romarinyoda ham biroz toliqish sezildi, ammo bu jarohat emas. Menimcha, u javob o‘yiniga shay holatda bo‘ladi.

N`Golo Kante: - O‘yin juda qiyin kechdi. Yuzaga kelgan imkoniyatlardan foydalana olmadik va raqib himoyasini yorib o‘tolmadik. Hammasini Jiddada hal qilishga harakat qilamiz.Imkon darajasida o‘ynadik. 

Men Yevropada tug‘ilganman va o‘sha yerda o‘ynaganman. Osiyo muhiti men uchun yangilik va bu yerga asta-sekin moslashyapman.