“Навбаҳор” – “Ал-Иттиҳод” (0:0) жамоалари ўртасидаги ўйиндан кейинги матбуот анжуманининг биринчи қисмида меҳмонлар бош мураббийи Марсело Гальярдо ва мазкур учрашувнинг энг яхши футболчиси деб топилган Н`Голо Кантелар иштирок этиб, журналистларнинг саволларига жавоб беришди. Қуйида уларнинг фикрларини эътиборингизга ҳавола ўтамиз.

Марсело Гальярдо: - Биз яхши ўйин ўтказдик, аммо майдон юқори сифатда эмасди. Биз яхши ҳимояландик ва дарвозамиз ёнида хавф яратилишига йўл қўймадик. Бирдамликда ҳаракат қилдик. Жамоанинг ўйинидан хурсандман. 

Рақиб ҳимояси зич бўлганлиги боис, уни ёриб ўтолмадик. Жидда шаҳридаги ўйин бошқача ўтади. Сўнгги вақтларда жароҳатлар туфайли бизга омад кулиб боқмади. 

Биз 19 нафар футболчи билан ўйнаяпмиз, қолганларнинг ҳам тезроқ сафга қайтишлари учун ҳаракат қиляпмиз. 

Бугун Ромариньода ҳам бироз толиқиш сезилди, аммо бу жароҳат эмас. Менимча, у жавоб ўйинига шай ҳолатда бўлади.

Н`Голо Канте: - Ўйин жуда қийин кечди. Юзага келган имкониятлардан фойдалана олмадик ва рақиб ҳимоясини ёриб ўтолмадик. Ҳаммасини Жиддада ҳал қилишга ҳаракат қиламиз.Имкон даражасида ўйнадик. 

Мен Европада туғилганман ва ўша ерда ўйнаганман. Осиё муҳити мен учун янгилик ва бу ерга аста-секин мослашяпман.