Leverkuzenning "Bayer" klubi agar "dorishunoslar" bosh murabbiyi Xabi Alonso uning xizmatlariga qiziqish bildirayotgan "Liverpul"ni boshqarish uchun klubni tark etish istagini bildirsa, "mersisaydliklar" uning uchun 21 million funt sterling (24 million yevro) miqdorida tovon to‘lashini kutmoqda. Bu haqda Mirror nashri xabar bermoqda.
Manbaga ko‘ra, "Liverpul" rahbariyati Alonsoni joriy mavsum yakunida jamoani tark etadigan amaldagi bosh murabbiy Yurgen Kloppning o‘rniga asosiy nomzod sifatida ko‘rmoqda.
Eslatib o‘tamiz, avvalroq OAVda ingliz klubi allaqachon Alonso bilan bog‘lanib, unga uch yillik shartnoma taklif qilgani haqida xabarlar tarqalgan edi.
