Xabaringiz bor, bugun "Andijon" "Bobur Arena"da 2024 yildagi dastlabki rasmiy uchrashuvini o‘tkazdi. Aleksandr Xomyakov boshchiligidagi "burgutlar" bugun "Bunyodkor" jamoasini qabul qildi va 5:1 hisobida g‘alaba qozondi.
O‘zbekiston chempionatida bu ikki klubning birinchi uchrashuvi 2007 yilning 22 iyun kuni bo‘lib o‘tgan. O‘shanda "Bunyodkor" "Quruvchi" nomi bilan qatnashardi. Andijondagi uchrashuvda mehmonlar 0:2 hisobida g‘alaba qozonishgan.
Hammasi bo‘lib, chempionat doirasida klublar shu kungacha 26 marta to‘qnashishgandi. Bugungacha "Andijon"ga "Bunyodkor"ni yengish nasib qilmagandi - 6 ta durang va 20 tasida "Bunyodkor"ning qo‘li baland kelgan. To‘plar nisbati 9-52 "Qaldirg‘ochlar" foydasiga edi. Bugungi uchrashuvdan keyin "Andijon" - "Bunyodkor" o‘rtasidagi statistika quyidagicha ko‘rinish oldi: 1-6-20, to‘plar nisbat 14-53.
"Andijon" klubiga yoqimsiz an’anaga barham nasib etdi va bu safar jamoa yirik hisobdagi g‘alaba orqali muxlislarining kayfiyatini yanada ko‘tara oldi.
