Хабарингиз бор, бугун "Андижон" "Бобур Арена"да 2024 йилдаги дастлабки расмий учрашувини ўтказди. Александр Хомяков бошчилигидаги "бургутлар" бугун "Бунёдкор" жамоасини қабул қилди ва 5:1 ҳисобида ғалаба қозонди.
Ўзбекистон чемпионатида бу икки клубнинг биринчи учрашуви 2007 йилнинг 22 июнь куни бўлиб ўтган. Ўшанда "Бунёдкор" "Қурувчи" номи билан қатнашарди. Андижондаги учрашувда меҳмонлар 0:2 ҳисобида ғалаба қозонишган.
Ҳаммаси бўлиб, чемпионат доирасида клублар шу кунгача 26 марта тўқнашишганди. Бугунгача "Андижон"га "Бунёдкор"ни енгиш насиб қилмаганди - 6 та дуранг ва 20 тасида "Бунёдкор"нинг қўли баланд келган. Тўплар нисбати 9-52 "Қалдирғочлар" фойдасига эди. Бугунги учрашувдан кейин "Андижон" - "Бунёдкор" ўртасидаги статистика қуйидагича кўриниш олди: 1-6-20, тўплар нисбат 14-53.
"Андижон" клубига ёқимсиз анъанага барҳам насиб этди ва бу сафар жамоа йирик ҳисобдаги ғалаба орқали мухлисларининг кайфиятини янада кўтара олди.
