"Barselona" markaziy himoyachisi Ronald Arauxo "Napoli"ga qarshi Chempionlar ligasi 1/8 final javob o‘yinida jamoasining harakatlarini yuqori baholadi.
Xavi Ernandes shogirdlari ilk uchrashuvda 1:1 hisobida durang o‘ynaganidan keyin o‘z maydonida 3:1 hisobida zafar quchdi.
"Bugungi o‘yin burilish nuqtasi, oldinga qadamdir. Biz kim bilan o‘ynashimizdan qat’i nazar, chorak finalda g‘alaba qozonish uchun hamma narsani qilamiz.
Natijadan juda mamnunman. O‘z uyimizda ajoyib o‘yin o‘tkazdik, dastlabki daqiqalardan muxlislarning qo‘llab-quvvatlashi katta yordam berdi.
Gol o‘tkazib yuborgan bo‘lsak ham, himoyada ajoyib o‘ynadik va bu Chempionlar ligasida juda muhim. Ikkinchi golimizdan so‘ng tashabbus “Napoli”ga o‘tishini bilardik, biroq o‘zimizni bosib oldik”, dedi Arauxo o‘yindan keyingi intervyusida.
