«Tottenxem»ning shvesiyalik yarim himoyachisi Deyan Kulushevski The Players Tribune saytida muxlislarni qiziqtiradigan ba’zi savollarga oshkora, ro‘y-rost javob berdi.
U jumladan, «Yuventus»da faoliyati nega o‘xshamagani haqida batafsil to‘xtaldi.
- Deyan, «Yuve»dan nega ketdingiz, asosiy sababni ayta olasizmi?
- Hammasi oddiy: «Yuventus» zaxirasida naq 6 oy o‘tirdim. Bunday vaziyatda har qanday futbolchi o‘zini noxush his etadi. Axir butun hayotini futbolga bag‘ishlagan, bor kuchi bilan ishlagan futbolchining shunchaki, zaxirada o‘tirib, o‘z pozisiyasida aslida vinger bo‘lmagan yigit qanday o‘ynashini tomosha qilishi juda og‘ir. Ochig‘ini aytsam, Turin klubida o‘zimni o‘ta noqulay sezdim, hatto keraksiz futbolchidek ham. Ba’zilar o‘yinim «Yuventus» uchun yetarli daraja yaxshi emasligini, o‘ta sekin ekanligimni ham aytishdi. Albatta, bunday gap-so‘zlar futbolchiga qattiq ta’sir etadi. Axir hammamiz insonmiz.
- «Yuve»dan ketish istagi o‘sha payt tug‘ildimi?
- O‘zi ketishim zarurligi oydinlashib boraverdi. Qisqasi, 2022 yilning yanvar oyi, ya’ni qishki transferlar oynasi yopilishiga bir necha kun qolgan pallada agentimdan yangi klub topishini so‘radim. Aslida ishonmagandim, chunki vaqt qolmagandi hisob. Keyin agentim birdan xizmatimga «Tottenxem» tomonidan qiziqish borligini aytdi. Bunga javoban tezda Londonga eng yaqin parvoz vaqtini aniqlashtirishini iltimos qildim.
- Turinda Krishtianu Ronaldu bilan munosabatingiz qanday bo‘ldi?
- Krishning qattiq ishlashi, barchaga yana nimalarnidir isbotlashni xohlayotganini ko‘rdim. Vaholanki, uning uchun isbotlaydigan narsaning o‘zi qolmagan bo‘lsada. Rostini aytaman, hech qachon biror klubdoshimdan nimadir so‘ragan emasman, lekin bir kuni Krishtianudan onam uchun futbolkamga imzo qo‘yib berishini iltimos qildim. Bundan 5 yilcha oldin Shvesiyaga qaytish varianti ustida jiddiy o‘ylagan, u yerda hattoki, oddiy ish bilan shug‘ullanishni rejalashtirgandim. Qa-rangki, taqdirga ko‘ra, Turinda eng buyuk futbolchilardan biri bilan o‘ynash baxti nasib etdi.
- Umuman, «Yuve»dan nimalar oldingiz?
- Ko‘pchilik «Yuventus»da muvaffaqiyatsizlikka uchraganimni aytadi. Bu g‘alati fikr, zero, Turinda 2ta sovrin yutdim, har ikki finalda o‘ynadim, gol urdim. Qolaversa, sobiq klubim - «Atalanta» darvozasi zabt etilgan payt golga assistentlik qildim. Ha, klubdagi oxirgi 6 oy juda og‘ir o‘tdi. «Tottenxem» safiga qo‘shilganimda ham, aslida nuqul pastga tortadigan spiraldan qanday chiqib ketishni bilmasdim...
MUHAMMADXON tayyorladi
