Qirg‘iziston U20 terma jamoasi “Bobur Arena”da “Andijon”ga qarshi xalqaro o‘rtoqlik uchrashuvida maydonga tushdi va mezbonlarga 3:0 hisobida yutqazdi. Bellashuvdan so‘ng Qirg‘iziston U20 terma jamoasi bosh murabbiyi Mirlan Eshenov “Andijon” matbuot xizmatining savollariga javob berdi.
-O‘yinda sizda qanday taassurot qoldirdi?
-Birinchi navbatda “Andijon” futbol klubiga o‘zimizning chuqur minnatdorligimizni bildiramiz. Ular bizga barcha sharoitlarni yaratib berishdi, xususan mashg‘ulot maydonlarini taqdim qilishdi va bundan minnatdormiz. Biz uchun qiyin o‘yin bo‘ldi. Ko‘rinib turdiki, “Andijon” maydonga g‘alaba ishtiyoqida tushdi. Bizda esa himoyadan hujumga o‘tishda muammolar ko‘zga tashlandi. Futbolchilarimizni o‘zaro kontaktlarida nuqsonlar sezildi. “Andijon” esa g‘alaba uchun harakat qildi. Maydonda kuchli ekanligi ko‘rinib turdi va ajoyib o‘yin namoyish etishdi.
-“Andijon”ning qaysi futbolchisi sizda iliq taassurot qoldirdi?
-To‘g‘risini aytsam, men ko‘proq o‘zimizning o‘yinchilarimiz harakatlariga e’tibor qaratdim. Ammo Abdumannonovni o‘yinlari menga ancha yoqdi. Himoya va hujumni bir-biriga ulashda katta ishni bajardi.
-Bungacha Farg‘onada “Neftchi”ni 3:2 hisobida mag‘lub etgandinglar. Bu safar esa yirik hisobda jamoangiz yengildi. Ikkala o‘yinlarda qanday farqlarni ko‘rdingiz?
-Bilasizmi, “Neftchi” ham yaxshi jamoa ekan. Biroq ular bizga to‘g‘ri baho bermasdan maydonga chiqqandek tuyuldi. O‘yinda imkoniyatlarimizdan unumli foydalanib, g‘alabaga erishdik. Ular bizni yosh jamoa deb o‘ylashdi, shekilli. Agar ular astoydil o‘ynab imkoniyatlaridan foydalanganlarida yutishlari ham mumkin edi. Tezlik va sifatli o‘yin bo‘yicha “Andijon” klubi yaxshiroq ko‘rindi.
-Ayting-chi, “Andijon”ning Superligadagi imkoniyatini qanday baholaysiz?
-O‘zbekiston chempionatini hurmat qilamiz va o‘yinlarni doim kuzatib boramiz. Chunki O‘zbekiston chempionati mintaqadagi eng kuchlilaridan biri. Terma jamoalaringiz xalqaro maydonlarda yaxshi natijalarga erishyapti. U20 termangiz ham muvaffaqiyatlarga erishmoqda. Mana, stadionda ularning yorqin g‘alabasidan esdalik surat ham bor ekan. “Andijon”ga to‘xtalsam, yaxshi jamoa. Mana shunday o‘yini bilan O‘zbekiston chempionatida yuqori o‘rinlarda bo‘lishi kerak, deb o‘ylayman.
“Andijon” matbuot xizmati.
