"Tottenxem" himoyachisi Ben Devis Antonio Kontening klubdagi faoliyati haqidagi fikrlari bilan o‘rtoqlashdi.

Italiyalik mutaxassis 2021 yilning noyabrida “shporlar”ni qabul qilib olgandi. U jamoani Chempionlar ligasiga olib chiqishga muvaffaq bo‘ldi, ammo keyingi mavsum u qadar muvaffaqiyatli bo‘lmadi va 2023 yilning martida mutaxassis klubni tark etdi.

"Konte darhol jamoamizni o‘zgartirdi. Uning qo‘l ostida biz kuchli edik, gollar urdik, o‘yinlarda ustunlik qildik. O‘sha paytda hamma narsa ishlagan. Xuddi Pochettino davrida bo‘lgani kabi bizda o‘zimizga ishonch hissi bor edi va ba’zida g‘alaba qozonishimizni oldindan bilardik. Tizim a’lo darajada ishladi, biz bunga ko‘nikib qoldik va uning samaradorligiga to‘liq ishondik", - deya Devisning so‘zlarini keltiradi jurnalist Jyulyen Loren.