23 yoshgacha bo‘lgan o‘yinchilar o‘rtasidagi Osiyo Kubogi musobaqasi boshlanishiga sanoqli kunlar qoldi.

O‘zbekiston olimpiya terma jamoasi “D” kvartetida Malayziya, Vyetnam va Kuvayt jamoalari bilan bir guruhdan joy olgan. Guruh bosqichidagi o‘yinlar va o‘zbekistonliklarga raqiblik qiladigan ushbu jamoalarning U23 Osiyo kuboklaridagi ishtiroki haqida nimalar ma’lum?

Dastlabki o‘yin 17 aprel kuni Malayziyaga qarshi kechadi. Bahs Toshkent vaqti bilan 18:00 da start oladi. Uchrashuvga 2022 yilgi jahon chempionatining naqd 8 ta o‘yinini o‘tkazgan “Khalifa International Stadium” arenasi mezbonlik qiladi.

Raqib haqida. Bu mazkur yosh toifasidagi Malayziya jamoasining uchinchi bor Osiyo kuboklarida ishtirok etadi. 2018 yilgi musobaqada jamoa chorak finalgacha yetib borib, o‘zlarining eng yaxshi natijasini ko‘rsatgan.

Ikkinchi o‘yin 20 aprel sanasida Kuvayt jamoasi bilan o‘tadi. Toshkent vaqti bilan 20:30 da boshlanadigan bahs “Al Janoub Stadium”da kechadi. Darvoqe, ushbu arena JCH-2022 dagi 7 ta o‘yinni qabul qilgan.

Bu Kuvayt U23 jamoasi uchun ham uchinchi Osiyo kubogi. Ular 2013 va 2022 yilgi musobaqalarni guruh bosqichidayoq yakunlashgan.

Guruhdagi so‘nggi o‘yin uchun O‘zbekiston jamoasi yana “Khalifa International Stadium”ga qaytadi. 23 aprel kuni asosiy raqib Vyetnam bilan katta ehtimol birinchi o‘rin masalasi hal etiladi. O‘yin Toshkent vaqti bilan 20:30 da boshlanadi.

Vyetnam U23 jamoasi beshinchi bor Osiyo kuboklarida qatnashadi. Ularning eng yaxshi ko‘rsatkichi final hisoblanadi. 2018 yilgi turnirda Ravshan Haydarov boshchiligidagi o‘zbekistonliklar finalda aynan ushbu jamoa vakillarini mag‘lubiyatga uchratgan va vetnamliklar kumush medalga sazovor bo‘lgan.

O‘zbekiston uchun esa bu ushbu yosh toifasidagi oltinchi Osiyo Kubogi bo‘ladi. Jamoa 2018 yilgi musobaqa g‘olibi. Shuningdek, O‘zbekiston 2022 yilgi turnirda finalgacha yetib borgan.

Bugun, 13 aprel kuni O‘zbekiston U23 jamoasi Qatarda dastlabki mashg‘ulotlarni o‘tkazdi. Terma jamoa o‘z uchrashuvlarini jahon chempionati o‘yinlari bo‘lgan stadionlarda o‘tkazishi jamoa futbolchilari o‘z imkoniyatlarini ochib bera olishi, texnikasini namoyish qila olishi uchun yaxshi imkon bo‘ladi.