O‘zbekiston olimpiya terma jamoasi bosh murabbiy Temur Kapadze Osiyo kubogi guruh bosqichi 3-turi doirasida bo‘lib o‘tadigan Vyetnamga qarshi o‘yin oldidan o‘z fikrlari bilan o‘rtoqlashdi.

Tayyorgarlik haqida
Ertangi o‘yin oldidan bugun oxirgi mashg‘ulotni o‘tkazdik. Eng asosiysi — barcha o‘yinchilar sog‘-salomat. Futbolchilar ertangi bahsga tayyor. Ertaga ham oson o‘yin bo‘lmaydi. Chunki Vyetnam ham yaxshi jamoa. Ishlar reja asosida davom etyapti. Ertaga ham kerakli natija uchun maydonga tushamiz.

Legionerlar haqida
Legioner futbolchilarimiz jamoa safiga yetib kelishganidan albatta xursandmiz. Ular jamoaga yanada kuch bag‘ishlashadi. Oldimizga qo‘yilgan maqsadga erishishda ular ham o‘z hissasini qo‘shadi, deb o‘ylayman. Eng asosiysi, ular Qatarga sog‘-salomat yetib kelishdi. Bugun to‘liq tarkib bilan mashg‘ulot o‘tkazdik. Asosiy o‘yinlarimiz ham oldinda. Yigitlarda kayfiyat yaxshi. Legionerlarimiz kelmaganida ham maqsadimiz o‘zgarmasdi. Ular bilan esa tarkibimiz yanada kuchayadi.

Rotasiya haqida
Abduqodirni ertaga maydonga tushirsam kerak. So‘nggi paytlarda unda o‘yin amaliyoti biroz kamaydi. Abbosni esa vaziyatga qarib ikkinchi bo‘limda maydonga tushirishim mumkin. Ular ertangi bahsda maydonga tushishsa, jamoaga tezroq kirishib ketishadi. Tarkibda rotasiya bo‘ladi. Har bir o‘yinda kuchga to‘la futbolchilar bilan ishtirok etishga intilamiz.