“Lester” mavsum yakuniga bir o‘yin qolganida chempionlikni qo‘lga kiritdi.

Enso Mareski boshchiligidagi jamoa Chempionship 45-turi doirasidagi o‘yinda “Preston”ni mehmonda (3:0) mag‘lub etib, turnir jadvalida 1-o‘rinni qo‘lga kiritdi.

3-o‘rinda borayotgan “Ipsvich” peshqadamga yetib olish imkoniyatini yo‘qotdi. Ikkinchi o‘rindagi “Lids” avvalroq “tulkilar”dan o‘zib ketish imkoniyatini yo‘qotgan edi.

“Lester” hisobida 97 ochko bor va yana bitta o‘yin o‘tkazadi – o‘z maydonida “Blekbern”ga qarshi. Eslatib o‘tamiz, jamoaning turnirdagi eng yaxshi to‘purari 37 yoshli Jeymi Vardi bo‘lib, u 18 ta gol urgan.

Avvalroq, "Lester" quyi ligaga tushib ketganidan keyin bir yil o‘tib APLga qaytishni kafolatlagan edi: jamoa 2022/23 yilgi mavsum oxirida Angliya oliy divizionini tark etib, 18-o‘rinni egallagan edi.

"Lester" 8 marta chempionlikni qo‘lga kiritdi va 7 ta chempionlikka ega "Man Siti"ni bu borada ortda qoldirdi.

Eslatib o‘tamiz, ketma-ket to‘rtinchi mavsum Chempionshipda g‘oliblikni avvalgi mavsumda Premyer-ligadan tushib ketgan jamoa qo‘lga kiritmoqda.