Myunxenning “Bavariya” klubi bosh murabbiyi Tomas Tuxel nima uchun “Real” bilan Yevropa Chempionlar Ligasi yarim finalining javob o‘yinida hujumchi Xarri Keynni almashtirganini tushuntirdi. Eslatib o‘tamiz, angliyalik futbolchi Alfonso Devisga golli pas berib, “Bavariya”ga hisobni ochishga yordam berdi. Biroq so‘nggi daqiqalarda “Real” kambek amalga oshirdi va Xoseluning dubli evaziga 2:1 hisobida g‘alaba qozondi.
“Keyn o‘yinni davom ettira olmadi. Bu to‘rtta hujumkor o‘yinchilarimizga ham tegishli edi. Xarrining belida muammo bor. Gnabri? Uning ham xuddi shunday jarohati bor”, dedi Tuxel matbuot anjumanida.
Eslatib o‘tamiz, "Bavariya" 2013 yildan beri har mavsumda sovrinlarni qo‘lga kiritib kelayotgandi. Keyn transferidan so‘ng jamoaning seriyasi uzildi. 30 yoshida Xarri faoliyati davomida bironta ham sovrin yutmagan edi.
