39 yoshli markaziy himoyachi Tyago Silva London klubidagi so‘nggi o‘yinidan so‘ng "Chelsi" bilan ta’sirli xayrlashdi. APLning 38-turida londonliklar o‘z maydonida “Bornmut”ni qabul qilib, 2:1 hisobida g‘alaba qozondi.

"Farzandlarim siz uchun o‘ynayotganini ko‘rishni orzu qilaman. Rahmat, "Chelsi". Muxlislarga rahmat. Sizlarni hammalaringizni yaxshi ko‘raman. Bay-bay", - deb post qoldirdi braziliyalik futbolchi o‘zining ijtimoiy tarmoqdagi sahifasida.

"Fluminense" avvalroq Tyago Silva jamoaga qaytganini e’lon qilgan edi. Braziliyalik futbolchining "ko‘klar" bilan shartnomasi shu yilning yozida yakuniga yetadi.

Eslatib o‘tamiz, braziliyalik futbolchi 2006 yildan 2009 yilgacha "uch ranglilar" kattalar jamoasida o‘ynagan. Bu davrda u barcha turnirlarda 97 ta uchrashuvda qatnashib, 9 ta gol va 4 ta golli uzatmani amalga oshirgan.

Joriy mavsumda 39 yoshli himoyachi barcha turnirlarda 38 ta uchrashuvda ishtirok etib, 4 ta gol va bitta golli uzatmani amalga oshirdi.