39 ёшли марказий ҳимоячи Тьяго Силва Лондон клубидаги сўнгги ўйинидан сўнг "Челси" билан таъсирли хайрлашди. АПЛнинг 38-турида лондонликлар ўз майдонида “Борнмут”ни қабул қилиб, 2:1 ҳисобида ғалаба қозонди.

"Фарзандларим сиз учун ўйнаётганини кўришни орзу қиламан. Раҳмат, "Челси". Мухлисларга раҳмат. Сизларни ҳаммаларингизни яхши кўраман. Бай-бай", - деб пост қолдирди бразилиялик футболчи ўзининг ижтимоий тармоқдаги саҳифасида.

"Флуминенсе" аввалроқ Тьяго Силва жамоага қайтганини эълон қилган эди. Бразилиялик футболчининг "кўклар" билан шартномаси шу йилнинг ёзида якунига етади.

Эслатиб ўтамиз, бразилиялик футболчи 2006 йилдан 2009 йилгача "уч ранглилар" катталар жамоасида ўйнаган. Бу даврда у барча турнирларда 97 та учрашувда қатнашиб, 9 та гол ва 4 та голли узатмани амалга оширган.

Жорий мавсумда 39 ёшли ҳимоячи барча турнирларда 38 та учрашувда иштирок этиб, 4 та гол ва битта голли узатмани амалга оширди.