Superliga 2024 yilgi mavsumning 8-turi yakuniga yetdi. O‘zbekiston futbol hakamlari markazi tur yakunlariga ko‘ra, Ekspert-hakamlar komissiyasining navbatdagi yig‘ilishini o‘tkazdi va tur doirasida kuzatilgan bahsli vaziyatlar tahlil qilindi. 8-tur doirasida o‘tkazilgan o‘yinlarda jami o‘n bitta bahsli vaziyat yuzaga keldi. Hakamlar 3 holatda xatoga yo‘l qo‘ygan.
“Andijon” — “Metallurg” bahsining 18-daqiqasida maydon egalarining 66-raqamli futbolchisi ehtiyotsizligi sabab mehmonlar vakili oyog‘ining himoyalanmagan qismiga shikast yetkazdi. Bosh hakam Sultonmurod Abdurahmonov bu holatda andijonliklar himoyachisiga sariq kartochka ko‘rsatdi.
Ekspert-hakamlar komissiyasi qaroriga binoan ushbu vaziyatda futbolchi raqibiga o‘ta keskin tarzda busasining tag qismi bilan zarba bergan va unga jiddiy jarohat yetkazishi mumkin deb hisoblandi va komissiya hakamning qarorini noto‘g‘ri, deb hisoblagan.
“Qizilqum” — “Olimpik” bellashuvining 80-daqiqasida mezbonlar raqib jarima maydonida xavfli vaziyat yuzaga keltirdi. Bu vaziyatda navoiyliklarning 8-raqamli futbolchisi to‘p uchun kurashda maydonga yiqildi. Bosh hakam To‘rabek Suyunov VAR orqali holatni o‘rganganidan so‘ng penaltiga ishora qildi.
Ekspert-hakamlar komissiyasi qaroriga binoan ushbu epizodda himoyachi to‘p uchun kurashga kirgan va penalti uchun yetarli asos mavjud emas deb hisoblanib, komissiya hakamning qarori noto‘g‘ri bo‘lganini ma’lum qilgan.
“Surxon” — “Nasaf” bahsining 90+1-daqiqasida nominal mezbonlarning 17-raqamli futbolchisi qarshiliklar jarima maydonida raqibi bilan to‘p uchun kurashda yiqildi. Bosh hakam Ilgiz Tantashev esa VARdagi uzoq tekshiruvdan keyin vaziyat penaltiga tortmasligini qayd etdi.
Ekspert-hakamlar komissiyasi qaroriga binoan bu holatda hujumchi qulay vaziyatga chiqib borayotgan bir vaqtda himoyachi tomonidan to‘xtatib qolindi. Shuningdek, mehmonlar vakili birinchi to‘pga emas, raqibning oyog‘iga zarba berdi. Komissiya bu holatda penalti uchun asos yetarli deb hisoblaydi va komissiya hakamning qarorini noto‘g‘ri, deb topgan. Mazkur vaziyat sababli Ilgiz Tantashev chiqargan qaror qo‘mitaga oshirilgan.
Qolgan bahsli vaziyatlarda eksspertiza komissiyasi hakamlar qarorini qo‘llab-quvvatlagan.
