"Barselona" sardori Serxi Robertoning kelajagi hali ham noaniq bo‘lib turibdi. Jurnalist Xavi Migel bergan ma’lumotlarga ko‘ra, "Blaugrana" rahbariyati hali yozda shartnomasi tugaydigan tajribali futbolchi bilan nima qilishni hal qilmagan.
Qayd etilishicha, agar bosh murabbiy Xavi Ernandes iste’foga chiqarilsa, Robertoning "Barselona"ni tark etish ehtimoli yuqori. Ilgari yarim himoyachi "ko‘k-anorranglilar" bilan yangi shartnoma imzolash uchun maoshini kamaytirishga tayyor edi.
32 yoshli Roberto joriy Ispaniya chempionatida 3 ta gol urdi va 2 ta golli uzatmani amalga oshirdi. Serxi 2010/11 yilgi mavsumdan beri "Barselona"da o‘ynab kelmoqda.
