Saudiya Arabistoni chempionatining 34-turida “Al-Hilol” jamoasi “Al-Vahda”ni mag‘lub etdi (2:1).

Shu tariqa, Jorje Jezush boshchiligidagi jamoa chempionatda ham, (hozirda) mamlakat kubogi va Superkubogida ham mag‘lub bo‘lmagan.

31 may kuni “Al-Hilol” Qirol kubogi finalida Krishtianu Ronalduning “An-Nasr” klubiga qarshi maydonga tushadi.

Saudiya Arabistoni chempionatining joriy mavsumida “Al-Hilol” futbolchilari 34 uchrashuvda 101 ta gol urgan bo‘lsa, jamoa o‘z darvozasidan 23 ta gol o‘tkazib yuborgan. Jamoa 96 ochko (31 g‘alaba, 3 durang) to‘plab chempion bo‘ldi.

Eslatib o‘tamiz, “An-Nasr” mavsum davomida 100 ta gol urdi. Krishtianu Ronaldu to‘p tepayotgan klub 82 ochko bilan ikkinchi o‘rinni egalladi.