«An-Nasr» va Krishtianu Ronaldu shartnomani uzaytirishi mumkin.
Forvardning amaldagi shartnomasi 2025 yilning yoziga qadar mo‘ljallangan. "talkSport" xabariga ko‘ra, Saudiya klubi Ronaldu bilan shartnomasini yana bir yilga - 2026 yilgacha uzaytirish bo‘yicha muzokara olib borishni rejalashtirmoqda. Krishtianu bunday taklifga ochiq. Agar shartnoma uzaytirilsa, u ish haqini oshiradi. Hozirda unga bonuslarni hisobga olmaganda 200 million yevro to‘lanadi.
Ronaldu bilan shartnomani uzaytirish ustuvor vazifa sifatida qaralmoqda. Saudiya Arabistoni ligasi 2025 yilda televideniye bilan shartnomani uzaytirish bo‘yicha muzokaralar olib borishi kerakligini inobatga olgan holda, hujumchini saqlab qolish zarur, deb hisoblamoqda.
Agar uning shartnomasi uzaytirilsa, Ronaldu kamida 41 yoshga to‘lgunicha futbolda qoladi. Qolaversa, «An-Nasr» bilan yangi kelishuv unga 2026 yilgi jahon chempionatiga borish imkoniyatini berishi mumkin.
O‘tgan mavsumda Ronaldu Saudiya Arabistoni chempionatining 31 ta o‘yinida 35 ta gol urib, bir mavsumdagi gollar rekordini yangiladi.
