Superliga 10-turidan o‘rin olgan "Navbahor" – "Olimpik" (0:0) o‘yinidan so‘ng mehmonlar bosh murabbiyi Timur Kapadze o‘z fikrlarini bildirib o‘tdi.
Qiyin uchrashuv bo‘ldi, balki omadimiz ham kelgandir. Qolaversa, darvozabonimiz ham yaxshi harakat qildi. "Navbahor"da 2-3 ta qulay vaziyat bo‘ldi. Futbolchilarim oxirigacha kurashdi. Namanganda o‘ynash qiyin. Boisi, bu yerda jamoa ham, muxlislar ham yaxshi. O‘ylashimcha, maydonda yaxshi kurash bo‘ldi.
Men o‘yinni cho‘zish haqida ko‘rsatma berganim yo‘q. Shunchaki, ayrim vaziyatlarda bu ko‘zga tashlangan bo‘lishi mumkin. "Navbahor" kuchli jamoa va yigitlar biroz nafas rostlab olishga intilgan bo‘lishlari mumkin. O‘ylashimcha, maydonda yaxshi kurash kechdi. "Navbahor" aynan o‘sha epizodlar sabab g‘alaba qozonmadi, deb o‘ylamayman. Biz oxirigacha kurashdik. Jamoaning o‘zi imkoniyatlaridan foydalana olmadi.
"Navbahor" oldiga yuqori maqsadlar qo‘yilgan va shu sababli bugun bosim bo‘lishini bilar edik. Lekin, biz boshqacha o‘yin ko‘rsatmoqchi edik. Mezbonlar bizga ushbu rejani amalga oshirgani imkon bermadi va himoyalanishga to‘g‘ri keldi.
