O‘zbekiston Superligasining 8-tur doirasida bo‘lib o‘tgan “Andijon” – “Metallurg” uchrashuvi paytida stadiondagi ayrim muxlislar tomonidan turli xil jismlar uloqtirilishi natijasida O‘FA Tartib-intizom qo‘mitasi tomonidan jarima qo‘llanilgandi.

Andijon viloyati Milliy gvardiya xodimlari tribunadan maydonga turli xil narsalar uloqtirgan muxlislarni aniqlab, ularga tegishli jazo choralari qo‘llagani ma’lum qilindi.

“Andijon” jamoasi matbuot xizmati muxlislarga murojaat yo‘lladi:

“Endilikda jamoamizning har bir uy uchrashuvi uchun sektorlarda alohida nazorat kameralari ishga tushiriladi. Shunday ekan, “Bobur arena”ga keladigan ishqibozlardan tartib-intizomga qat’iy amal qilishlarini so‘rab qolamiz.

Jamoamizni qo‘llab-quvvatlang, ammo aslo tartibsizlikka yo‘l qo‘ymang. Buning oqibatini yuqoridagi videoda ko‘rib turibsiz. Ertaga siz ham shu holatga tushib qolmang!

Jamoamizni 2 iyun kuni Paxtakorga qarshi o‘tkaziladigan uchrashuvda stadionda faol qo‘llab-quvvatlang va barchaga namuna bo‘ling”.

Eslatib o‘tamiz, “Andijon”ning “Paxtakor”ga qarshi o‘yini 2 iyun kuni 19:00 da bo‘lib o‘tadi. Andijonliklar ortda qolgan 9 turdan so‘ng Superliga turnir jadvalida 14 ochko bilan 6-o‘rindan joy olgan.