“CAMC Engineering” kompaniyasining Bosh direktori bilan Olimpiya shaharchasidagi qurilish jarayoni muhokama qilindi.

Ayni kunlarda Xitoyning “CAMC Engineering” kompaniyasi Bosh direktori Li Xaysin Toshkentda mehmon bo‘lib turibdi.

Bugun Sport vazirligida Toshkent-2025 yoshlar Osiyo o‘yinlari uchun barpo etilayotgan Olimpiya shaharchasining bugungi holati va kelgusida kompleksdan samarali foydalanish masalasiga bag‘ishlangan uchrashuv bo‘lib o‘tdi.

Yig‘ilishni vazir Adham Ikramov olib bordi. Unda, shuningdek, MOQ Bosh kotibi Oybek Kasimov va soha mutaxassislari ishtirok etishdi.

Uchrashuvda olib borayotgan bunyodkorlik ishlarining bugungi holati va qo‘shimcha quriladigan yana ikkita bino (tibbiyot markazi va 400 o‘rinli mehmonxona)ning loyihasi batafsil muhokama qilindi.

Adham Ikramov kompleksning barpo etilishini davlatimiz har tomonlama qo‘llab-quvvatlayotgani, qurilish ishlari uzliksiz olib borilishi uchun barcha sharoit yaratib berilayotganini ta’kidladi.

Janob Li hamkorlik Xitoy kompaniyasi uchun ham manfaatli bo‘layotgani, kelgusida ham qator loyihalarni birgalikda amalga oshirishdan mamnun bo‘lishini bildirdi.

Yig‘ilish doirasida Oybek Kasimov musobaqani o‘tkazish direksiyasining tashkiliy tuzilmasi va uning faoliyati haqida taqdimot o‘tkazdi.

Suhbat davomida qurilish ishlarini jadallashtirish, barpo etilayotgan qo‘shimcha binolar va tashrif buyuruvchilar uchun ko‘ngilochar maydonlarining loyihasini takomillashtirish bo‘yicha qo‘shimcha tavsiyalar berildi.