"Everton" faxriysi Eshli Yang mersisaydliklar klubi bilan yangi bir yillik shartnoma imzoladi.

Yang o‘tgan yozda "Everton" bosh murabbiyi sifatida Shon Daychning birinchi xaridi bo‘ldi va "Aston Villa"dan erkin agent sifatida "Everton"ga qo‘shildi.

O‘shandan beri Yang "Everton" safida 34 ta o‘yinda maydonga tushib, 38 yoshu 34 kunligida "Gudison Park"da klub tarixidagi eng keksa debyutantga aylandi.

Kelgusi oy 39 yoshga to‘ladigan Yang yoshiga qaramay "Everton"ga foydali bo‘la olishini isbotladi va "Manchester Yunayted", "Uotford" va "Inter"ning sobiq futbolchisi bilan 2025 yil iyunigacha yangi shartnoma imzoladi.

"Men shartnomamni qayta imzolashda ikkilanmadim. Mavsum tugashidan oldin murabbiy bilan gaplashdim. U nima istayotganimni, qolishni xohlashimni so‘radi va men darhol "ha" dedim, chunki bu yerda o‘tkazgan vaqtim menga yoqdi.

Klubning saviyasi, xodimlari, futbolchilari va, albatta, muxlislar, ular zo‘r edi... O‘tgan mavsumda men bu yerda o‘tkazgan vaqtimdan zavq oldim. Bizda ko‘tarilishlar va pasayishlar bo‘ldi, lekin men bu qanchalik katta klub ekanligini ko‘rib turibman.

Men buning bir qismi bo‘lishni xohlayman" - dedi Yang.

Yana shuni qo‘shimcha qilamizki, Yang APLda 453ta, Angliya terma jamoasida esa 39ta o‘yin o‘tkazgan. Eshli Premyer-liga, A Seriya, Angliya kubogi va Yevropa ligasida g‘olib chiqqan.