"Эвертон" фахрийси Эшли Янг мерсисайдликлар клуби билан янги бир йиллик шартнома имзолади.
Янг ўтган ёзда "Эвертон" бош мураббийи сифатида Шон Дайчнинг биринчи хариди бўлди ва "Астон Вилла"дан эркин агент сифатида "Эвертон"га қўшилди.
Ўшандан бери Янг "Эвертон" сафида 34 та ўйинда майдонга тушиб, 38 ёшу 34 кунлигида "Гудисон Парк"да клуб тарихидаги энг кекса дебютантга айланди.
Келгуси ой 39 ёшга тўладиган Янг ёшига қарамай "Эвертон"га фойдали бўла олишини исботлади ва "Манчестер Юнайтед", "Уотфорд" ва "Интер"нинг собиқ футболчиси билан 2025 йил июнигача янги шартнома имзолади.
"Мен шартномамни қайта имзолашда иккиланмадим. Мавсум тугашидан олдин мураббий билан гаплашдим. У нима истаётганимни, қолишни хоҳлашимни сўради ва мен дарҳол "ҳа" дедим, чунки бу ерда ўтказган вақтим менга ёқди.
Клубнинг савияси, ходимлари, футболчилари ва, албатта, мухлислар, улар зўр эди... Ўтган мавсумда мен бу ерда ўтказган вақтимдан завқ олдим. Бизда кўтарилишлар ва пасайишлар бўлди, лекин мен бу қанчалик катта клуб эканлигини кўриб турибман.
Мен бунинг бир қисми бўлишни хоҳлайман" - деди Янг.
Яна шуни қўшимча қиламизки, Янг АПЛда 453та, Англия терма жамоасида эса 39та ўйин ўтказган. Эшли Премьер-лига, А Серия, Англия кубоги ва Европа лигасида ғолиб чиққан.
