Angliya terma jamoasi bosh murabbiyi Garet Sautgeyt Ispaniyani Yevro-2024dagi eng kuchli jamoa deb hisoblaydi. Seshanba kuni ispanlar fransuzlar qarshiligini sindirishdi (2:1), oradan bir kun o‘tib inglizlar Niderlandiyani xuddi shu hisobda mag‘lub etishdi.
Turnir g‘olibi 14 iyul kuni aniqlanadi, final o‘yini Toshkent vaqti bilan soat 23:59ga belgilangan.
"Biz bu yerga tarix yaratish uchun kelganmiz. Bizni aql bovar qilmaydigan darajada qiyin o‘yin kutmoqda - biz ayni damda turnirning eng yaxshi jamoasiga qarshi maydonga chiqamiz. Biz kurashamiz", - dedi Sautgeyt UYEFA matbuot xizmatiga.
Angliya terma jamoasi ketma-ket ikkinchi marta Yevropa chempionati finalida ishtirok etadi. Bundan uch yil avval Garet Sautgeyt shogirdlari Italiyaga penaltilar seriyasida mag‘lub bo‘lgandi.
