Англия терма жамоаси бош мураббийи Гарет Саутгейт Испанияни Евро-2024даги энг кучли жамоа деб ҳисоблайди. Сешанба куни испанлар французлар қаршилигини синдиришди (2:1), орадан бир кун ўтиб инглизлар Нидерландияни худди шу ҳисобда мағлуб этишди.
Турнир ғолиби 14 июль куни аниқланади, финал ўйини Тошкент вақти билан соат 23:59га белгиланган.
"Биз бу ерга тарих яратиш учун келганмиз. Бизни ақл бовар қилмайдиган даражада қийин ўйин кутмоқда - биз айни дамда турнирнинг энг яхши жамоасига қарши майдонга чиқамиз. Биз курашамиз", - деди Саутгейт УЕФА матбуот хизматига.
Англия терма жамоаси кетма-кет иккинчи марта Европа чемпионати финалида иштирок этади. Бундан уч йил аввал Гарет Саутгейт шогирдлари Италияга пенальтилар сериясида мағлуб бўлганди.
